Plaza Ondo jubilatuen elkarteak Hondarribira (Gipuzkoa) irteera prestatu du hilaren 20rako. Hara joaten direnek eguna igaroko dute herri horretan, 09:00etan liburutegi ondoko geralekutik abiatuta, iluntzean itzuliko baitira Azkoitira. Tartean, bazkaria egingo dute Beko-Errota jatetxean.
Antolatzaileek azaldu dutenez, hamaiketakoa eramatea norberaren ardura izango da, eta 14:00etan bazkaria izango da: urdaiazpiko kroketak, gula eta langostino entsalada, entrekota edo bakailaoa, pantxineta, edariak eta kafea izango dute horiek menuan. Bazkalondoren, gainera, dantzaldia izango da 19:00ak arte.
Interesa duten jubilatuek asteazkenetik aurrera eman dezakete izena, eta autobusak bete artean izango dute horretarako aukera. Elkarteko bazkideek 45 euro ordainduko dute, eta gainontzekoek 50 euro.