Goizean meza entzunaz eta iluntzean Itziar jatetxean afalduta ospatu zuten San Agustin eguna atzo Aizpurutxon. Afariko garaian trikiti doinuekin alaitu zuten jatetxea, eta festa giro ederra sortu zen otordura batu zirenen artean.
Biharkoa izango da Aizpurutxoko festen azken eguna. Urbasoko Marmarrak taldeak antolatutako egitarauaren baitan, 20:00etan, elizaren paretik abiatuta, ibilaldia egingo dute auzoan zehar. Bi ordu eskaseko iraupena izango duen hitzordu horretan musika, auzoaren historia, olerkiak, ikus-entzunezkoak eta edariak uztartuko dituzte.
22:00etan, mokadua eskainiko dute auzoko pilotalekuan; leku ezberdinetako janaria dastatzeko aukera izango dute herritarrek bertan.
Jai egitaraua ixteko, berriz, Mozambikeko NBC Gas Butano musikariaren emanaldia izango da, 23:00etan hasita. Herrialde horretako doinuak eskainiko ditu artistak Aizpurutxon.