Azkoitiko Udalak ekaineko ohiko udalbatzarra egingo du bihar, asteazkena, udaletxeko bilkura areto nagusian. Batik bat, mozioak izango dituzte hizpide biharko saioan; izan ere, Azkoitia etxebizitza merkatuko tentsio handiko eremu izendatzeko mozioa eta Palestinako egoerari buruzko beste bat eztabaidatuko dituzte udal taldeek, biak EAJk eta PSE-EEk batera aurkeztutakoa.
Zapatuan, ekainaren 28an, ospatuko da mundu zabalean LGTBI+ kolektiboaren sexu askapenaren eta harrotasunaren nazioarteko eguna, eta horren harira, jeltzaleek eta sozialistek elkarrekin aurkeztutako mozioa ere eztabaidatuko dute. Bestalde, kreditu gehigarrien bidez Zubiaurre-Elkarguneko kreditu aldaketak jakinarazi eta behin betiko onespenen nahiz aurrekontuaren informazioaren berri emango dute.
Azkoitiko Udalari esker, Gukaren webgunean zuzenean jarraitu ahal izango da biharko udalbatzarra, 18:00etatik aurrera.
Hona hemen biharko udalbatzarraren eguneko zerrenda:
- Aurreko bilkurako aktaren onespena, hala badagokio.
- Kreditu gehigarrien bidez kredituak aldatzeko Zubiaurre-Elkargune Institutuaren 1 zenbakidun espedientearen onespena.
- EAJ-PNV eta PSE-EE udal taldeek aurkeztuko mozioa, Palestinako egoerari buruz.
- EAJ-PNV eta PSE-EE udal taldeek aurkeztutako mozioa, etxebizitza-merkatuko tentsio eremu izendatzeko.
- EAJ-PNV eta PSE-EE udal taldeek aurkeztutako adierazpena, LGTBI+ kolektiboaren sexu askapenaren eta harrotasunaren nazioarteko egunekoa.
- Behin betiko onespenen berri ematea.
- Aurrekontuari buruzko informazioa.
- Galde-erreguak.