Sun magoak Houdiniren magia ikuskizuna eskainiko du igandean, apirilak 6, Baztartxo antzokian. 17:00etan hasiko da magoa bere azken ikuskizunaren emanaldiarekin. Disney Channelen Club Houdini telesaileko kidea den ilusionistak publiko guztientzako ikuskizuna aurkeztuko du Azkoitian.
Iñaki Ruiz de Galarretak Espainiako Magia saria jaso zuen. Dena den, hura ezagunagoa da Sun magoa bezala, aditua baita muturreko ihesaldiak, ilusio handiak, desagertzeak eta lebitazioak eskaintzen, baita antzerkiko zein telebistako ikuskizunetan ere. Hain zuzen, enigmak, agerpenak, desagerpenak eta ur-tangaren ihesa eskaini ohi ditu magoak bere emanaldietan, eta horietako zenbait eskainiko ditu Baztartxon ere. Ikuskizunerako sarrerak Entradium atarian daude salgai, zortzi euroan.