Apirilaren 26an izango da aurtengo haurren danborrada, eta dagoeneko hasi dira prestaketekin. Hain zuzen ere, atzo arratsaldean egin zuten aurreneko entsegua Gurea pilotalekuan, eta danborradan parte hartuko duten gaztetxoak zein harmailetatik begira zituzten gurasoak astelehen arratsalde atsegina igaro zuten.
60 urte beteko ditu aurten Azkoitiko umeen danborradak, eta hori aitzakia hartuta, zenbait berrikuntza txertatu ditu Tata danborrada elkarteak. Besteak beste, HH5etik DBH2ra arteko haurrek eta nerabeek parte hartuko dute festan; alegia, zabaldu egin dute adin tartea. Era berean, pieza berri bat ere jo beharko dute haurrek: iaz helduen danborradan estreinakoz jo zuten San Martin martxa, hain zuzen. Horrez gain, hamar mikelete ere aterako dira gastadoreekin batera desfilean. 2025eko karroza egiteko hautatu duten gaia, berriz, Azkoitia eta pilota izango dira.
Atzokoa aurreneko entsegua izan zen, eta hurrengoak apirilaren 2an, 3an, 7an, 9an, 10ean, 14an, 23an eta 24an gauzatuko dituzte. Hitzordu guztiak 19:00etarako jarri dituzte, Gurea pilotalekuan, eta parte hartzaileek ordubeteren bueltan jardungo dute danborradako pieza guztiak entseatzen.