Eraso matxista baten berri eman du Itaiak. Erakunde horren arabera, joan zen larunbatean, martxoaren 8an hain zuzen, gizon batek emakume bat jipoitu zuen Azkoitiko taberna batean.
"Kasu hau ez da, zoritxarrez, isolatutako gertakari bat. Hala izatetik urrun, oraindik ere emakume langileon eguneroko ogi izaten jarraitzen du indarkeria matxistak", salatu du antolakundeak sare sozialetan.
Itaiaren ustez, matxismoa "normalizatu" egin da gizartean eta, ondorioz, haren kontrako borroka itzali. Hori dela eta, indarkeria mota horren aurrean antolatzeko deia egin die emakume langileei. "Emakumeok lehen lerroan egon behar dugu matxismoaren aurkako borrokan", berretsi du.