Munoaundin zuhaitzak landatu dituzte gaur goizean Xabier Munibe Ikastolako eta Floreaga ikastetxeko LH 4. eta 5. mailetako ikasleek. Eguzkipean, gaztetxoek udal brigadako langileekin batera egin dituzte landaketak ikasleek beraiek sortuta duten basoan, eta intxaurrondoak, haritzak, pagoak, urkiak, lizarrak eta erramuak landatu dituzte, besteak beste.
Eskolako Agenda 2030aren barruan egin dute gaur goizeko saioa. Izan ere, egitasmo horri lotuta, eskolek urtean behin landatzen dituzte zuhaixkak eremu horretan. Dena den, udalak azaldu du eskolak "lanketa sakona" egiten ari direla agenda horri lotuta; aurten, mugikortasun jasangarria ari dira aztertzen.