Euskadi Irratiko Hiru Erregeen Mahaia irratsaioa Azpeitiko plazatik egin zuten atzo, eta saioa osatzeko, hainbat kirol hitzordu izan ziren 16:00etatik 20:00etara. Txinparta gehien Azkoitia-Azpeitia mendi demak piztu zuen. Joxe Apalantza errezildarrak duela 32 urte egindako marka gogoan, Azpeitiko plazatik Xoxotera joan-etorria egin zuten bi herrietako taldeek.
1992an, Apalantzak 00.45.09 denboran egin zuen Xoxotera joan-etorria, Oranda artzainaren 50 minutuko marka hobetuz. Inork ez du haren lana hobetu ordutik, eta horregatik, Apalantzari keinu egin zioten. Unai Zialtzeta kapitain zutela, Azpeitiko taldea osatu zuten Naroa Uriak, Eneritz Aramendik, Ibai Angulok eta Peio Ziarsolok. Joseba Diazen aginduetara Azkoitia ordezkatu zuten, bestalde, Mari Carmen Seijasek, Aner Gesalagak, Iñaki Azkoitiak eta Ainhoa Sanzek.
Azkenean, Azpeitiko taldea izan zen nagusi, baina taldea osatu zuten kirolari denen artean ere ez zuten lortu Apalantzak duela 32 urte jarritako marka hobetzerik. Apalantzak ondutako errekorra "ikaragarria" dela argi gelditu zela nabarmendu zuten, eta, beraz, zaila izango dela hobetzea. Dena den, "saltsa polita" izan zela adierazi zuten kirolariek.