Orion ehiza eta arrantza elkarteko Aimar Ansola, Joanes Karrera eta Julen Amado azkoitiarrek euli salmonido gazteen arrantzako Espainiako txapelketan parte hartuko dute datorren astean, irailaren 5etik 8ra bitartean. Palentziako Carrion ibaian arituko dira lehian hirurak, euskal selekzioa ordezkatuz.
Urte gogoangarria ari da izaten hiru azkoitiarrentzat: Aimar Ansolak Munduko Arrantza Txapelketan parte hartu zuen duela hamabost egun Txekiako Errepublikan, eta 44. postua eskuratu zuen han. Halaber, Ansolak berak irabazi zuen Euskadiko Euli Arrantza Txapelketako aurtengo lehia udaberrian, Joanes Karrerak laugarren postuan amaitu zuen txapelketa hura, eta Julen Amado zazpigarren sailkatua izan zen.