Azkoitiko Udalak eta Urolako Komunikazio Taldeak (UKT) lankidetza hitzarmena sinatu dute, Gukak bere egitasmoa aurrera ateratzen laguntzeko. Ana Azkoitia alkateak, Ihintza Elustondo UKTren lehendakariak eta Uxua Ostolaza UKTren kudeatzaileak sinatu dute hitzarmena.
UKTk 45.150 euroko diru laguntza jasoko du udalaren eskutik, eta diru partida hori "euskararen erabilera soziala handitzeko dituen neurrien barruan" sartzen dela nabarmendu du udalak, "hedabideak euskara bera eta euskararen kalitatea elikatzeko tresna" direlako. Era berean, informazioa euskaraz ematea "giltzarri" dela gaineratu du erakundeak.