Azkoitia 700 egitarauaren barruan, bisita gidatua egin zuten atzo, ostirala, Irunen dagoen Gipuzkoako Ondare Bildumen Zentroan, Gordailuan, Munoaundi herri harresituko arkeologia ondarea ezagutzeko asmoz. Dozena bat lagunek egin zuten bat deialdiarekin, eta Sonia San Jose arkeologoak gidatuta, herritarrek bertatik bertara ikusi ahal izan zuten Aranzadik azken urteetako indusketetan bildutako ondarea.
Hain zuzen, Aranzadi zientzia elkarteko Historiaurreko Arkeologia sailekoek zuzenduta, uztailaren 15etik abuztuaren 3ra bitartean ariko dira Munoaundiko aztarnategian lanean. Bisita gidatua, berriz, uztailaren 27an egingo dute.
