Zabaldu dute Tta-kun AFE Zaleen Txapelketarako izen ematea, eta antolatzaileek jakinarazi dutenez, izena ematen duten lehen 32 taldeek soilik izango dute parte hartzeko aukera. Aurten, uztailaren 8tik 20ra jokatuko dituzte partidak. Izena eman nahi duten taldeek mezua bidali beharko dute Tta-kun areto futbol taldearen Instagram kontura.
Taldeak zortzi jokalariz osatuta egongo dira –entrenatzailea ere izan dezakete, nahi izanez gero–, eta bajarik egongo balitz, ezin izango litzateke fitxaketa berririk egin. Talde bakoitzak, gutxienez, bi mutil eta bi neska izan beharko ditu, eta kapitaina.
Urtero legez, kanporaketa bidezko formatuan jokatuko dute, eta beraz, partida bakoitzeko irabazleek aurrera jarraituko dute eta galtzaileak txapelketatik kanpo geratuko dira. Partida bakoitzak 10 minutuko bi zati izango ditu.