Euskadiko Traineru Txapelketa jokatu zuten atzo Donostian, itsasoaren muturreko egoerak baldintzatuta. Dena den, ez zen ezustekorik izan ez emakumeen ezta gizonen lehian ere, eta azken horienean, Urdaibai Bermeoko taldea nagusitu zen. Beraz, Jon Unanue Dukie arraunlari azkoitiarrak txapela jantzi zuen, bere taldekideekin batera. Ez da aurreneko aldia azkoitiarrak txapel hori eskuratzen duela, Bermeokoek hirugarrenez jarraian irabazi baitute Euskadiko Txapelketa — guztira, bederatzi aldiz irabazi du txapelketa—.
Ohorezko txandan lehiatu zen Urdaibai, Getaria, Zierbena eta Hondarribiarekin batera. Getaria eta Zierbena atera ziren lehen, eta, jarraian, Hondarribia eta Urdaibai. Bermeokoek aurrea hartu zioten Zierbenari, eta 23.38.99ko denboran egin zituen lau luzeak, Zierbena baino minutu erdi lehenago. Emakumeetan, Arraun Lagunak Donostiako trainerua nagusitu zen.