Bikers Urola Kosta motozaleen taldeak antolatuta, moto topaketa egingo dute larunbatean laugarrenez Azkoitian. 09:30 inguruan hasiko dira motozaleak herriko plaza nagusian elkartzen; izan ere, ordu horretan zabalduko dute 14:30ean lagunartean egingo duten bazkarirako izen ematea. Bazkarirako izen ematearen prezioa 28 eurokoa da.
Partaide guztiak elkartzen direnean, ibilbide bat egitera aterako dira, 10:30ean abiatuta. Itziarko Itziar ostatu jatetxe aldera joango dira; 11:15 inguruan iritsiko dira hara, eta ordubete inguruko geldialdia egingo dute bertan. Itziar ostatu jatetxetik berriro Azkoitira zuzenduko dira motozaleak, 13:00etan egingo baitute txikiteoa. Aurtengoan, Laja jatetxean egingo dute bazkaria, 14:30ean.
Arratsaldean ere jarraipena izango du motozaleen jaiak. 17:30ean, DMT Team pilotu eskolaren erakustaldia izango da. Iaz, Julio Urkixo kalean egin zuten moto erakustaldia; aurten, herriko plazan egingo dute.