Aste honen hasieratik, Maxixatzen.eus atariko erabiltzaileek aukeran dute testuak irakurri ala testu horiek entzutea. Izan ere, albiste guztietan, titularraren gainaldean ageri da albistea entzuteko barra, eta hor, pertsonaren irudiaren gainean klik eginda, erabiltzaileak Ihintza edo Jabi kazetariaren ahotsa aukera dezake. Hedabide honetako kazetariak dira biak. Play botoiari eman, eta albistea goitik behera irakurriko du ahotsak.
Elhuyarrek Tokikomeko bazkideentzat –tartean UKT Urolako Komunikazio Taldearen webguneentzat– garatu du teknologia hori adimen artifizialean puntakoa den arkitetura neuronala erabilita. Horretarako, hedabide bakoitzeko bina kazetarirekin grabaketa saioak egin dituzte aurrez, horiei hainbat hitz eta esaldi irakurraraziz.
Urolako Komunikazio Taldeak aurrerantzean ere bide horretan jarraituko du, hau da, herritarrak euskaraz informatzen segitzeko gaur egun eskura dauden puntako teknologiak baliatzen; eta, hori, nola ez, bertako eragile eta enpresekin egingo du.