Garaipenik gabe igaro dute asteburua Anaitasuna futbol taldeko lehen taldeetako neska-mutilek, porrotarekin eta berdinketarekin amaitu baitute astea.
Gizonezkoei dagokienez, Hirugarren Mailan den Anaitasunako taldeak Padura taldearen aurka neurtu zituen indarrak larunbat arratsaldez, Arrigorriagan. 82. minutuan iritsi zen Paduraren gola, eta 1-0 galdu zuten gorrixek neurketa.
Emakumezkoek, berriz, Reala C taldea izan zuten aurkari igande arratsaldez, Txerloian. Hasiera makurra izan zuten, Realak bi gol sartu baitzizkien 5. eta 18. minutuetan; baina Maiderrek 27. eta 36. minutuetan sartutako bi golei esker, partida berdintzea lortu zuen gorrixen taldeak. Azkenean, 2-2 amaitu zuten partida emakumezkoek.