Gipuzkoako Foru Aldundiak emandako datuen arabera, Azkoitiko Udalak 9.584.677 euro jasoko ditu Udalak Finantzatzeko Foru Funtsetik (UFFF), iaz jasotakoa baino %5,1 gehiago. Jokin Perona Ogasun eta Finantza diputatuak atzo arratsaldean Gipuzkoako Finantza Kontseiluan jakitera eman zuenez, UFFF Udalen Finantzaketarako Foru Funtsak 610 milioi euroko zuzkidura izango du 2023. urtean, aurreikusitakoa baino 1,4 milioi euro gehiago; alegia, diru kopuru hori gehiago jasoko dute Gipuzkoako udalek aurten. Izan ere, zerga bilketan uste baino diru gehiago bildu du aldundiak.
Datorren urtean, berriz, 651 milioi euro izango ditu UFFFk. "Bai aurtengoa, bai datorren urterako aurreikuspen berria, inoizko foru funtsik handienak dira. Gainera, 2024an, funtsaren zuzkidura lehenengo aldiz izango da 650 milioi eurotik gorakoa", jakinarazi zuen aldundiak. "Horrela, udalek baliabide gehiago izango dituzte egoera ekonomikoari aurre egiten jarrai dezaten", nabarmendu zuen Peronak. Hain zuzen, aurreikuspenen arabera, Azkoitiko Udalak 10.206.851 euro jasoko ditu Udalen Finantzaketarako Foru Funtsetik (UFFF) datorren urtean, aurtengo aurrekontua baino 643.921 euro gehiago; hau da, %6,49 igoko da aurrekontua, aurreikuspenak betez gero.
Ana Azkoitia alkateak azaldu du "berri oso ona" dela udalak diru kopuru hori izango duela jakitea: "Oraintxe hastear gaude datorren urteko aurrekontuen zirriborroa lantzen, eta horrek ariketa bat egitea eskatzen du. Herritarren beharrak eta finantziazio beharrak orekatzearen ariketa, alegia". Horrez gain, udala 2023-2027 Agintaldi Plana lantzen ari dela azaldu du hark.
Guztiek, gehiago
Azkoitikoak ez ezik, gainontzeko udal guztiek ere aurreikusitakoa baino gehiago jasoko dute aurten, baita Urola Kostakoek ere. Beizamak izango du igoera txikiena, iazkoarekin alderatuta %0,61ekoa, baina bestalde, eskualdean berak jasotzen du diru gehien biztanleko (1.482 euro). Igoera handiena, berriz, Azpeitiak eta Aizarnazabalek izango dute iazkoarekin alderatuta, %5,11 eta %5,37, hurrenez hurren.
Gainerako udalek %3,5 eta %4 inguru gehiago jasoko dute, Errezilek izan ezik (%2,68koa izango da igoera han).
Aldundiak datu gehiago ere eman ditu herriz herri: besteak beste, 2022ko likidazioa zenbatekoa izan zen, eta biztanleko zenbat euro jasotzen duen herri bakoitzak. Baita datorren urterako aurreikuspenak zein diren ere. Hain zuzen, udalek diru gehiago jasoko dute 2024an aurtengoarekin alderatuta. Aiak, esaterako %10eko igoera ere izango du, eta eskualdeko herri gehienek %6tik %8ra arteko igoerak izango dituzte.
| Udala | Likidazioa 2022 |
Aurrekontua 2023 |
Itxiera aurreikus. | Betetze maila | Aldakuntza 2023/2022 |
Biztanleko euroak | 2024rako aurreikuspena |
| Aia | 1.606.040 | 1.657.605 | 1.661.374 | %100,23 | %3,45 | 793 | 1.830.182 (+%10,16) |
| Aizarnazabal | 657.353 | 691.081 | 692.653 | %100,23 | %5,37 | 895 | 718.780 (+%3,77) |
| Azkoitia | 9.196.811 | 9.562.930 | 9.584.677 | %100,23 | %4,22 | 825 | 10.206.851 (+6,49) |
| Azpeitia | 11.903.486 | 12.482.858 | 12.511.244 | %100,23 | %5,11 | 826 | 13.360.416 (+6,79) |
| Beizama | 200.365 | 201.129 | 201.586 | %100,23 | %0,61 | 1.482 | 202.816 (+%0,61) |
| Errezil | 516.465 | 529.078 | 530.281 | %100,23 | %2,68 | 939 | 553.849 (+%4,44) |
| Getaria | 2.197.838 | 2.279.866 | 2.285.050 | %100,23 | %3,97 | 809 |
2.465.235 (+%7,89) |
| Orio | 4.781.071 | 4.966.069 | 4.977.362 | %100,23 | %4,11 | 821 | 5.289. 177 (+7,89) |
| Zarautz | 18.283.418 | 18.884.335 | 18.927.279 | %100,23 | %3,52 | 819 | 20.121.888 (+6,31) |
| Zestoa | 2.992.455 | 3.091.846 | 3.098.877 | %100,23 | %3,56 | 826 | 3.298.853 (+%6,45) |
| Zumaia | 7.902.679 | 8.226.708 | 8.245.416 | %100,23 | %4,34 | 812 | 8.927.720 (+%8,27) |
*Iturria: Gipuzkoako Foru Aldundia.