Atzo, igandearekin, bukatu zen Durangoko Azokaren aurtengo edizioa, baina ez liburu aurkezpenen tartea. Izan ere, azokari lotuta, gaurtik hilaren 23ra bitartean hainbat liburu aurkezpen egingo dituzte Euskal Herriko zenbait liburu dendatan, Zu non, han da! egitasmoaren barruan.
Azkoitian izango da aurkezpen horietako bat. Ostiralean, abenduaren 16an, Maite Lopez idazle azkoitiarrak Amatu (Alberdania) lana aurkeztuko du Amaitz liburu dendan, 18:30ean hasita. Gainera, urtarrilaren 7ra arte Durangoko Azokako aurtengo nobedadeak eskuratu ahal izango dira saltoki horretan.