Gaur ere ezin izan du garaipena eskuratu Domusa Teknik ISBk, eta beraz, Emakumeen Challenge Ligako azkenaurreko postuan jarraitzen du Joseba Lizarralde Rubiok gidatzen duen taldeak. Etxean jokatu dute norgehiagoka, 11:00etan hasita, Celta Zorka Recalvi taldearen kontra, eta Vigoko taldea nagusitu da, 52 eta 65.
Aurretik hasi dute partida Domusa Teknik ISBko emakumeek; izan ere, sailkapena 15 eta 13koa zela bukatu da lehen laurdena. Bigarren laurdena ere estua izan da, eta 29 eta 28 aurretik zen ISB. Atsedenaren ostean, baina, behera egin du nabarmen taldeak; hirugarren laurdenean bederatzi puntu eskuratu ditu etxeko taldeak, eta hemeretzi galiziakoak: 37 eta 47 amaitu da. Laugarren eta azken zatian, berriz, indar pixka bat atera du Azkoitiko eta Azpeitiko taldeak, baina ez zaio aski izan garaipena eskuratzeko.
Denboraldiko hirugarren jardunaldian lortu zuen aurreneko garaipena ISBko emakumeen taldeak, eta harrezkero, ez du punturik batzerik lortu; gaurkoan, sasoiko zazpigarren partida jokatu dute. Asteburuan Cordoban jokatuko dute Domusa Teknik ISBko emakumeek; zapatuan izango da neurketa, 18:00etan. Sailkapeneko erditik atzerako postuetan da Andaluziako taldea, bi garaipen erdietsita.