Orion elkarteko kide Aimar Ansola eta Joanes Karrera Espainiako Euli Arrantza Txapelketan lehiatuko dira datorren asteburuan. Bi azkoitiarrek euskal selekzioarekin jokatuko dute jubenil mailako txapelketa, eta aurtengoan, Lleidan (Katalunia) lehiatuko dira arrantzaleak. Hain zuzen ere, El Pont de Suert herrian jokatuko dute txapelketa, Ribagorzana ibaian.
Iaz Euskadiko txapelketan lortutako emaitzei esker sailkatu dira Ansola zein Karrera Espainiako norgehiagokara, eta biak ala biak ostiralean eta larunbatean arituko dira txapelaren bila euli arrantzan. Ansolarentzat ez da aurreneko aldia izango Espainiako txapelketan arituko dena, aurretik ere parte hartutakoa baita; Karrera, berriz, estreinakoz arituko da lehia horretan.