Gaur, igandea, XL. Azkoitia Hiria xake txapelketa jokatu dute Kontzejupean, Joxe Azkueren omenezko XI. edizioa. Anaitasuna Kakute xake taldeak antolatu du proba, eta txapelketa arrakastatsua izan da. Hamazazpi taldetako ia 70 xakelarik parte hartu dute gaurkoan. Talderik onena Santurtzi A izan da 58 puntu batuta; bigarren, Barakaldo sailkatu da 52 punturekin, eta hirugarren Anaitasuna Kakute A, 45,5 puntu eskuratuta.
10:00etan hasi da lehia, eta lau pertsonaz osaturiko taldeetan bost minutuko partida azkarrak jokatu ditu xakelari bakoitzak. Anaitasuna Kakutetik, guztira, hiru taldek parte hartu dute: Anaitasuna A, Anaitasuna B eta Anai Neskak. Hain zuzen, gaurkoa egun historikoa izan da Anaitasuna Kakute taldearentzat, historian lehen aldiz emakumek soilik osatutako talde batek parte hartu baitu Azkoitia Hiria txapelketan.
Gainontzeko taldeak honakoak izan dira: Gipuzkoatik Azpeitia, Beasain, Eibar, Elgoibar, Gros, Hondarribia eta Villabona; Bizkaitik Barakaldo, Elorrio, Santurtzi eta Zornotza; Arabatik Martintxo taldea eta Kantabriatik (Espainia) Liendo. Sari banaketa ekitaldia egin ondoren, parte hartzaile guztiak bazkaltzera joan dira.