Joan zen larunbatean 30. Udaberriko Musikaldiaren barruko hirugarren kontzertua eskaini zuen Easo Abesbatzak Santa Kutzeko komentuan. Pablo Sorozabal (1897-1988) konpositore donostiarraren omenezko kontzertua eskaini zuen abesbatzak, Sorozabalen jaiotzaren 125. urteurrena baita aurtengoa. Besteak beste, honako kantuak abestu zituzten kontzertuan: Siete Lieder-en barruko Ametsetan, Lotoren Lorak eta Ez dot ziñesten; Eusko Indarra (Debako martxa), Ocho canciones a dos voces-en barruko Bihotz bat, Urrundik, Kuku, Ba al dakizu Maite? eta Penak, zein Sagar dantza.
Larunbat honetan, maiatzak 28, izango da Udaberriko Musikaldiaren aurtengo edizoko laugarren eta azken kontzertua. Hain zuzen ere, Pablo Sainz-Villegas gitarrista garaikideak Alma de guitarra española lana aurkeztuko du aurtengo edizioa ixteko. Enrique Granados, Francisco Tarrega eta Isaac Albenizen hainbat abesti joko ditu Errioxako gitarra-jotzaileak agertokian, 18:30ean hasita. Ohi bezala, 18:00etan doako autobusa aterako da Julio Urkixo kaleko geralekutik joan-etorria autobusez egin nahi duten herritarrentzat.
(Argazkiak: Azkoitiko Udala)