Gaia: Haurren esplotazioa
Doinua: Ez nau izutzen negu hurbilak III
Zorigaitzeko hainbat pertsona
ezerezaren aurrean
besteen gosez bizi ohi dira
kale izkina batean
guk haiekiko enpatiarik
ez daramagu soinean
ta horregatik ibiltzen gara
ez dugunaren eskean
gero tristura sentitzen dugu
nonbait ezetz entzutean
dugunarekin kexatzen gara
besteek ez dutenean.
Sei urterekin lanean gogor
dabiltza lurra zulatzen
baloia josi, egurra bildu
nola zama garraiatzen
baina ikusi artean ez da
inor horretaz ohartzen
eta eskua nola luzatu
beti ez dugu asmatzen
gurean berriz salerosketak
ez dira nekez gertatzen
baina guretzat opari dena
besteentzat tortura zen.