Bigarren urtez jarraian, World Athletics erakundeak ematen duen Road Race Label izeneko zigilua jaso du Azkoitia-Azpeitia maratoi erdiak. Diego Garciaren oroimenezko lasterketak "erakunde ofizial guztietako neurriak" betetzen dituela egiaztatzen du zigilu horrek; besteak beste, maratoi erdian lortutako markak nazioartean homologatuta egotea bermatzen du horrek.
"Azkoitia-Azpeitiak elite mailako lasterketa izaten jarraitu nahi du, bere ahalmenen barruan, baina ez da elitean bakarrik oinarritzen. Eliteaz gain, ofizialtasuna behar duten federatu edo afizionatu onak ere badaude", azaldu dute lasterketaren arduradunek, bereziki horientzat erakargarria izan daitekeelako guztiz homologatutako proba batean parte hartzea. Euskal Herrian Road Race Label zigilua duen maratoi erdi bakarra dela nabarmendu dute Azkoitia-Azpeitiaren antolatzaileek.
Hain zuzen ere, gaur arratsaldean aurkeztuko dituzte prentsaurrean martxoaren 26an egingo den aurtengo edizioaren xehetasun nagusiak.