Jakes Urangak Costa Blanca Bike Race mendi bizikleta proba irabazi du. Joan den asteburuan jokatu zuten proba Alacanteko (Herrialde Katalanak) Calpe herrian, eta Iker Azkune azpeitiarrarekin batera, mendiko bizikleta probako Half modalitatean nagusitu zen azkoitiarra. Bi etapa jokatu zituzten, lehena larunbatean eta bigarrena igandean; azkoitiarra eta azpeitiarra bi egunetan izan ziren azkarrenak.
Larunbatean, 31 kilometroko ibilbidea osatu behar izan zuten, eta Uranga eta Azkune lehenak iritsi ziren helmugara, 1.34.11 denbora eginda. Igandean ere helmuga gurutzatzen lehenak izan ziren azkoitiarra eta azpeitiarra. 50 kilometroko proba osatu behar izan zuen bikoteak, eta 2.54.59 denbora egin zuten. Bi egunetan egindako lanaren ondoren, podiumeko lehen koskara igo zen bikotea.
