Eskolako Agenda 2030 programaren barruan, baso berri bat eta urmaela eraikiko dituzte Munoaundin, eta Ingurumen Hezkuntzaren Nazioarteko Eguna aprobetxatu dute herriko ikasleek urmaelaren potzua egiteko. Bizilore Eskola Aktiboak, Floreaga Ikastetxeak, Azkoitia BHIk eta Izarraitz Lanbide Heziketa zentroak parte hartzen duten Eskolako Agenda 2030 programan, eta ikastetxe horietako ikasleak izan dira pikatxoia eta pala eskuetan Munoaundiko zuloa urmael bilakatzeko lanetan aritu direnak. Udalak jakinarazi duenez, "modu naturalean" beteko dute putzua orain, animaliak hara joan daitezen.
Azken urteetan "ikasleek egindako eskaerei erantzunez", Azkoitiko Udalak Munoaundiko lursail bat Urola Bizirik taldearen esku utzi du, eta beste zati bat Eskolako Agenda 2030ekoen esku; beraz, eremu horretan zeuden pinuak atera ondoren, bi zatitan banatu dute eremua talde banarentzat. Eskolako Agenda 2030 programako ikastaldeak dagoeneko zuhaitzez osatutako basoa sortzeko urratsak ematen ere hasi dira.
