Azkoitiko Udalak eta Gipuzkoako Ur Kontsortzioak 2019an berritu zuten Azkoitiko uraren kudeaketa integralaren inguruko akordioa, beste hamar urtetarako. Hitzarmenean jasotakoaren arabera, Ur Kontsortzioak azpiegituren hobekuntzan inbertsioak egiteko konpromisoa du, eta 2009az geroztik 1.777.000 euro inbertitu ditu herrian. Hain zuzen ere, azken urteetan egindako lanek ur sarearen errendimendua %94,24raino igotzen lagundu dutela jakinarazi du udalak.
Datozen zazpi urteetan, 2029ra bitartean, Ur Kontsortzioak 1.281.980 euro inbertituko ditu Azkoitian. Urtez urte zehazten dituzte bi erakundeek herrian egiteko dituzten inbertsioak, eta dagoeneko erabakita dituzte aurtengo eta datorren urteko esku hartzeak. Aurten, Floreaga auzoan eta Atxabaleta kalean identifikatuta dauden saneamendu-sareko isurketak jaso eta Aizkibel kaleko 13 eta 21 zenbakien arteko sareak aldatuko dituzte. 2023an, berriz, Bizkargi, Julio Urkixo eta Trino Uria kaleetako hornikuntza eta saneamendu sareak berrituko dituzte.
Azken urteetan ur horniduran eta saneamendu sareetan egin dituzte inbertsioak. Ur hornidurari dagokionez, hobekuntzak egin dituzte Santa Klaran, San Martinen, Altzibarren, Txalonerrekan eta Bizkargi kalean. Sanemandu sareko lanak, ostera, Txerloian, Floreagan, Altzibarren, Ipintzan edota Txalonerrekan egin dituzte. Azpiegiturak berritu dituzte hainbat kasutan eta isurketak jasotzea lortu dute.