Iaz bezala, aurten ere ez da Errege Magoen ohiko kabalkadarik egingo herriko kaleetan zehar, baina Meltxor, Gaspar eta Baltasar erregeak Azkoitiko haurrak bisitatzen arituko dira urtarrilaren 5ean, Errege egunaren bezperan. Azkoitiko Udalak adierazi duenez, 15:30etik aurrera ibiliko dira Errege Magoak kaleetatik, pare bat orduz; osasun egoera dela eta, ibilgailu batean egingo dute ibilbidea, jende pilaketak saihesteko asmoz. Parrokiak antolatu ohi du kabalkada Azkoitiko Udalaren laguntzarekin.
Bestalde, Azkoitiko haurren eta gaztetxoen gutunak jasotzeko zakuak ere prest daude gaur goizetik herriko hainbat txokotan. Hain zuzen ere, Elkargunean, Udaltzaingoaren bulegoaren aurrean eta Parrokiaren aurrean jarri dituzte zaku horiek.