Memoriaren Eguna da gaur, asteartea, eta Azkoitiko Udalak urteroko ekitaldia egin du herriko "biktima guztiak" oroitzeko asmoz. Udal ordezkariak zein hainbat herritar elkartu dira eguerdian Intsausti jauregiaren aurrealdean, hango zelaian baitago biktimen omenezko Oroimenean eskultura. Ohi bezala, bost minutuko elkarretaratze isila egin dute han bildutakoek, eta amaitutakoan, lore sorta jarri du Javier Zubizarreta alkateak eskulturaren aurrean, "biktima guztien memorian".
