Eusko Jaurlaritzaren Osasun Sailak duela minutu gutxi kaleratu ditu atzo, astelehena, Araban, Bizkaian eta Gipuzkoan egindako PCR eta antigeno proben emaitzak. Txostenaren arabera, Azkoitian atzo lau kasu positibo hauteman zituzten. Azken hamalau egunetako 100.000 biztanleko intzidentzia tasa, berriz, berdin-berdin mantendu da herrian. 191,94ko tasarekin, eremu horian jarraitzen du Azkoitiak.
Urola Kosta eskualdean, berriz, beste hiru kasu positibo baieztatu ditu Osasun Sailak. Azkoitiko lau positiboez gain, kasu bana zenbatu dute Orion, Zestoan eta Zumaian. Orion 130,46ko intzidentzia tasarekin jarraitzen dute –atzoko bera–, Zestoan 128,40koa da –atzo 102,72koa zen– eta Zumaian 111,94koa –atzoko bera–. Eskualdeko gainerako herrietan ez dute kasu positiborik atzeman. Intzidentzia tasei dagokienez, behera egin dute Azpeitian eta Zarautzen; Azpeitian 236,53ko zenbatekoa dute egun eta 132,78koa Zarautzen. Aian –957,18– eta Getarian –35,34– atzoko kopuru berdinean mantendu dira datuak. Aizarnazabalen, Beizaman eta Errezilen, berriz, hutsean dute intzidentzia tasa.
100eko langara hurbiltzen
Intzidentzia tasa 100eko langara hurbiltzen ari da Araban, Bizkaian eta Gipuzkoan; izan ere, 115,79koa da gaur zenbatekoa. Hego Euskal Herrian 145 kasu positibo zenbatu zituzten atzo; horietatik 57 Bizkaian hauteman zituzten, 45 Gipuzkoan, 26 Nafarroan eta 11 Araban. Lurralde horietatik kanpo bizi diren beste sei lagunek ere eman zuten positibo. Araban, Bizkaian eta Gipuzkoan 6.723 proba egin zituzten atzo, eta beraz, positibotasun tasa %1,8koa da. Nafarroan, aldiz, 2.027 proba egin zituzten, eta hori horrela, positibotasun tasa %1,3koa da.
Ospitaleen egoeraren berri ere eman dute Osakidetzak eta Osasunbideak. Araban, Bizkaian eta Gipuzkoan atzo hamasei lagun ospitaleratu zituzten; egun, 114 pertsona daude Osakidetzaren mendeko erietxeetan, atzo baino hamar lagun gutxiago. ZIUn, ostera, 50 herritar daude gaixorik, atzo baino bi gutxiago. Nafarroan, bestalde, atzo hiru pertsona ospitaleratu zituzten, eta gaur-gaurkoz 45 dira Nafarroako erietxeetan dauden herritarrak. ZIUn, aldiz, hamabi lagun daude.