Olotzagakoa (goian)
Aizpurutxorako bidegorritik gertu dago Olotzagako iturria. Zumarragarako errepidean, Elosurako bidegurutzearen parean, Urola ibaia zubitik zeharkatu eta bestaldean.Ur freskoa edatearekin batera, lasai ederrean lagunartean maxixatzen jarduteko aulkiak ere badaude bertan.
Landakandakoa
Landakandako San Antonio ermitaren ondoko iturria da irudian agertzen dena. Altzibarko biribilgunearen ondoan dago bai ermita baita iturria ere.
Auzoetan, nonahi
Iturri berri asko daude herriko auzoetan. Irudian agertzen dena, hain justu, Altzibar auzoan dagoena da. Sakagailua duten iturri hauetan, neguan izotza egiten duten egunetan, ura moztu egiten dute. Bestela, ura izoztu eta matxuratu egiten dira.
Kalean
Altzibar etorbidean dagoen iturrietako bat da. Kale Nagusiak eta Altzibar Etorbideak bat egiten duten bidegurutzean dago.
Arrabalean
Santa Klarako Arrabalean, San Jose basilikaren (Granada Egako dukearen panteoia) ondoan dagoen iturria da irudikoa.
Izkiturrikoa
Izkiturri Izarraitz mendikatean dago, Kakuteren atzealdean. Aittolatik Erlorako bidean, tragoxka bat edateko edota kantinplora betetzeko toki paregabea da. Goiko argazkia, joan den urtarrilaren hasieran ateratakoa da, iturria ia ez da antzeman ere egiten.
Atraskuakoa
Azkoitiko Parrokiaren atzealdean dagoen iturria da, izen bereko tabernaren aurrean. Garai batean, sakagailurik gabeko iturria zen.
San Juangoa
San Juango iturria topatzea nahiko nekeza da egun. Azkoititik Loiolarako bidegorrian, bidezidor batetik jaitsita aurkitu daiteke, baina belarrak eta landarediak nahiko estalita dute gaur egun.
Metal ura
Metal ura ematen duen iturria da goiko irudian agertzen dena. Altzibarretik Urrategirako bidean dago, Etxe-Alai etxearen eta Alberdi mekanizatuak tailerraren bitartean.
Herriko plazakoa
Kontzejupearen ondoan dago plazako iturria, udaletxe azpian. Garai batean iturri zahar txiki bat zen bertan, 1950eko hamarkadan, baina, gaur egungo iturri neoklasikoak ordezkatu zuen. Izarraizko marmolez egina da.
Uxerrekoa
Uxerreko iturria, izen bereko errekaren ondoan dago, Santa Klara konbentuaren atzealdean. Antoxina ere badago bertan iturritik ura edateko.