Gabonak badatoz izenburu hartuta, Azkoitiko Udalak herritarrak zoriontzeko bideoa egin du Bizkargi musika eta dantza eskolarekin elkarlanean. Bideoa astelehenean, abenduaren 21ean, zabalduko du udalak sare sozialetan. Bideoaren grabaketa azaroaren 28an egin zen herriko txoko ezberdinetan eta azken egun hauetan egin dira edizio lanak. Bideorako Gabonak badatoz abestia egin dute Musika Eskolakoek. Toy Story filmeko soinu banda erabili dute bideorako eta Aintzane Agirrebeña Bizkargiko pandero irakasleak egin du letra. Ahotsa, berriz, Paula Diazek jarri du.
Udalak eskerrak eman dizkie musika eta dantza eskola irakasle eta ikasleei bideoa egiteko egindako lanagatik eta parte hartzeagatik.