Ostiraletik igandera sei positibo baieztatu dituzte Azkoitian —ostiralean bat, larunbatean lau eta igandean bat—, aurreko asteburuan baino hamalau gutxiago, Eusko Jaurlaritzako Osasun Sailak emandako datuen arabera. Eta intzidentzia tasak ere beheranzko joerari eutsi dio. Duela astebete 100.000 biztanleko 967,55 zen, eta gaur 767,37 da. Oraindik ere Azkoitiak du eskualdeko tasarik altuena, baina datuek erakusken dute bilakaera baikorra dela eta joera indartzen ari dela.
Herrian ez ezik, eskualdean ere indarra galtzen ari da koronabirusa. Ostiraletik igandera, guztira, 35 positibo baieztatu dituzte Urola Kostako herrietan, aurreko asteburuan atzeman zituztenen erdiak baino gutxiago; 77 izan ziren orduan. Joera orokorra da, egorak udalerri guztietan egin du onera, eta intzidentzia tasetan antzematen da hori: gaur-gaurkoz, inork ez du gainditzen 100.000 biztanleko 800eko langa.
Ostiraletik igandera Azpeitian baieztatu dituzte positibo gehien; hamahiru —sei ostiralean, bi larunbatean eta bost igandean—, baina aurreko asteburuan baino bi gutxiago izan dira. Intzidentzia tasa altua du oaindik, 100.000 biztanleko 538,03, baina duela hilabete hiru aldiz handiagoa zuen, eta duela astebete ia bikoitza.
Zarautzen bederatzi positibo zenbatu dituzte ostiralaz geroztik —ostiralean lau, larunbatean hiru eta igandean bi—, aurreko asteburuan baino hamalau gutxiago, eta argi gorriak pizten diren 500eko muga horretatik geroz eta hurrunago dago. Gaur, 100.000 biztnaleko 369,08 da hango intzidentzia tasa.
Azkoitiaren atzetik, Orio da intzidentzia tasa altuena duen eskualdeko herria, baina han ere astebetean asko aldatu dira gauzak. Duela astebetebe 1.105,43 zen tasa, eta gaur 725,95 da. Ostiralaz geroztik, lau positibo baieztatu dituzte herrian —bi ostiralean, bat larunbatean eta bat igandean—.
Zestoan bi positibo zenbatu dituzte azken hiru egunotan, Zumaian bakarra, eta eskualdeko gainontzeko herrietan —Aia, Getaria, Errezil eta Beizama— ez dute positiborik atzeman.
Ospitaleratzeak gutxitzen
Hego Euskal Herrian 7.443 PCR eta antigeno test egin zituzten atzo, eta horietatik 521ek eman zuten positibo. Horrek esan nahi du positibo kopurua murriztu egin dela, testa gutxiago egin zituztelako, baina positibotasun tasa igo egin dela; %6,9koa da. Bizkaian 206 kasu baieztatu zituzten atzo, Gipuzkoan 177, Nafarroan 83, eta Araban 45.
Gaur-gaurkoz, koronabirusarekin lotutako arrazoiengatik 418 lagun daude Arabako, Bizkaiko eta Gipuzkoako erietxeetan ospitaleratuta; horietatik 136 Zainketa Intentsiboen Unitatean (ZIU). Joan den astelehenetik hona gorabehera handirik ez dute izan zenbaki horiek, baina aipatzekoa azken egunotan asko murriztu dela eguneko ospitaleratzeen kopurua. Joan den igandean 58 lagun ospitaleratu zituzten, eta atzo 24 izan ziren.