Azkoitiko Udalak Ugarteigarango igerileku irekien aurtengo datuak plazaratu ditu, eta jakinarazi duenez, 57.745 sarrera izan dira pasa den udan. Iazko denboraldiarekin alderatuta, igoera nabarmena izan du aurten igerilekuetara joan den kopuruak. Izan ere, joan zen urtean baino 8.461 sarrera gehiago erregistratu dituzte aurten.
Ekainaren 6tik irailaren 15era bitartean, egunero zabaldu zituzten Ugarteigarango ateak, eta Udalaren arabera, bazkidetza bonoarekin 54.054 sarrera erregistratu ziren aldi horretan. Eguneko sarrera ordaindutakoak, berriz, 2.611 izan dira, eta hamar sarrerako bonoarekin 1.080 erabilera zenbatu dituzte.