Anaitasuna Kakute Xake taldeak eta Iraurgi Abesbatzak izango dute aurtengo San Joan sua pizteko ohorea, igande honetan, hilak 23. Udalak herriko bi taldeei «merezitako aitortza» egin nahi die euren 40 urteko ibilbidean egindako lan boluntarioa eskertzeko. «Batzuk xakea zabaltzen eta sustatzen eta besteak, euren ahotsak plazaratzen. Guztiak dira Azkoitiko herriaren enbaxadore, eta horregatik nahi ditu zoriondu Udalak», azaldu dute Udaletik.
Egun gutxi geratzen dira San Joan sua pizteko, dantzak eta musikak lagunduta. Horra egitaraua:
Sua piztu aurretik, 19:30 inguruan, Xabier Munibe Ikastolako eta Floreaga Ikastetxeko Kandiola Dantza Taldeen eta Bizkargi Dantza Taldearen emanaldia izango da Balda plazan. Horren ondoren, Azkoitiko Musika Bandaren kalejira izango da. 22:00etan, Balda plazan, sua piztuko dute Anaitasuna Kakute Xake taldeko eta Iraurgi Abesbatzako kideek, Sahatsa Dantza Taldearen, Iraurgi Abesbatzaren, Parrokiako Abesbatzaren eta Azkoitiko Musika Bandaren laguntzarekin. Festarekin jarraitzeko, Bizkargi eskolako dantza taldeak 'XI. Zatoz Dantzara Balda Plazara' emanaldia aurkeztuko du.