Nola joan zen zapatuko txapelketa? Aukerarik ikusten zenuen irabazteko?
Irabazteko aukerak ikusten nituen, baina nire burua estutu gabe joan nintzen, ez irabazteko aukera ere hor egoten baita. Ondo joan zen, eta gustura amaitu nuen.
Zerk eraman zaitu txapela lortzera?
Lehen egiten nuena baino lan gehiago ari naiz egiten azken urteetan. Entrenamendu gogorragoak egiten ditut, eta lanak bere fruitua ekarri du.
Non gordeko duzu txapela?
Etxeko sarrerako armairu gainean dut, beste garaikur guztiekin batera.
Nori eskainiko zenioke?
Nire inguruan laguntzen ibili diren eta lagundu izan didaten familiako kideei, lagunei eta kuadrillakoei.
Zure boladarik onenean al zaude?
Aspaldi honetan ondo nabil, baina lanean segi eta denborarekin hobetzen jarraitu nahi dut.
Nolako entrenamenduak egin dituzu azkenaldian?
Euskal Herriko Harri Handien Txapelketarako entrenamendu gogorrak eginez ibili naiz, eta Urrezko Harri-JasotzaileTxapelketarako antzeko saioak egin ditugu.
Aurrerantzean zein txapelketetan parte hartzeko asmoa duzu?
Harri Handien Txapelketan irteteko asmoa dut, baina aurretik nire marka pertsonalen bat hobetzen saiatu nahi dut. Beste txapelketaren batean edo bestean ere lehiatuko naiz.
Amets bat?
Lanean jarraitu nahi dut eta denborarekin Harri Handien txapela irabazi.