Bihar 16:00etan hasiko da umeen kalejira. Floreagatik sartuko dira ikasleak Aizkibel kalera, eta handik eliz atarirako bidea hartuko dute. Jarraian, Plaza Berria eta Balda plaza zeharkatuta, Santa Klara kalerako joango dira kalejiran. Umeen danborradak egiten duen ibilbide bera izango du ondoren kalejirak. Zubira iritsitakoan, eskuin aldera joango dira neska-mutilak, Trino Uria aldera. Gero, errepidearen aurkako noranzkoan, Bizkargi kaletik egingo dute pasadizoa Eroski Txiki aurrera atera arte. Segidan, Balda plazara abiatuko dira, eta berriz Plaza Berritik pasata herriko plaza nagusian amaituko dute ibilbidea.
Musika iluntzera arte
17:00ak inguruan iritsiko da kalejira herriko plazara, eta bertan Udalak opila eta txokolatea eskainiko dizkie kalejiran ateratako ikasleei. Ordu berean hasiko da Oihan Vega DJaren dantzaldia ere. Iluntzera arte girotuko du plaza Oihan Vegak. 21:30etik 23:30era, berriz, gaztetxoen mozorro lehiaketa egingo dute, Elkargunean. 12 eta 17 urte bitarteko neska-mutilek izango dute lehiaketan parte hartzeko aukera. Udalak sariak banatuko dituela jakinarazi du. Festa girotzeko ardura DJ Xabi Fest-ek izango du.