Datorren uztailaren 7an eta 8an, autismoaren alde Gipuzkoako kostaldea igerian zeharkatuko dute 60 igerilarik baino gehiagok. Marea Urdinean parte hartuko duten igerilariek kostaldea erreleboak eginez zeharkatuko dute, Saturrarandik (Mutriku) Hondarribira, 64 kilometro. Gaur goizean, egitasmoa aurkeztu dute antolatzaileek Elkargunean, eta, bide batez, parte hartuko duten igerilariei zeharkaldiaren datu teknikoak azaldu dizkiete.
Autismoa duten pertsonen gizarteratzearen aldeko egitasmo bat da Marea Urdina, eta helburua gizartea gai horren inguruan sentsibilizatzea da. Marea Urdina 2017ko urtearen erdialdean sortu zen, lau lagunen eskutik. Igeriak, eta oro har kirola egiteko duten zaletasunak, autismoaren aldeko erronka baten bidean jarri ditu: Gipuzkoako kostaldea igerian zeharkatzea.
