Aurten, gainera, Gipuzkoako eta Euskadiko maratoi erdi Txapelketa izango da AZKOITIAZPEITIA maratoi erdia. Jimenezek hau azaldu du lasterketaren harira: «Urte guzti hauetan lortu da AZKOITIAZPEITIA Europako mapan kokatzea. Baina lasterketa hau ez litzateke izango gaur egun dena boluntarioen eta babesleen laguntzarik gabe». 350 lagunetik gora dira boluntario gisa parte hartzen dutenak.
Izen handiak
Eliteko atleten partaidetza azpimarragarria den arren, AZKOITIAZPEITIA kutsu herrikoia mantentzearen aldekoa da, «korrika ondo egiteak ez duelako esan nahi azkar egitea, baizik eta bakoitzak bere mailan lasterka egitea», Jimenezen hitzetan. Edonork du parte hartzeko aukera eta beldurtu gabe, horretara animatu nahi da jendea antolakuntzatik.
Parte hartuko duten eliteko atleten artean, hor daude gizonezkoetan Emmanuel Bett, Mark Kiptoo edo Samuel Kiplimo. Eta hain ezagunak guretzat ez izan arren, sekulako markak dituzten James Rungaru, Stephen Omito, Joseph Kiprono edota Ronal Kirui.
Emakumezkoetan, berriz, Leonida Jemwetich, Mercy Kepchumba, Hauwi Megersa, Azucena Díaz edota Zulema Fuentes espero dira.
Hainbat jarduera eta festa ukitua lasterketaren bueltan
AZKOITIAZPEITIA lasterketaren bueltan, Azpeitian eta Azkoitian egitarau zabala antolatzen da. Lasterketa egunean, Oihan Vega arituko da Plaza Berrin Azkoitian eta Txurru Azpeitiko plazan.
Horretaz gain, ostegun honetan, martxoaren 15ean, nutrizioari eta elikadurari buruzko hitzaldia eskainiko da Elkargunean, 19:00etan. Eta hilaren 22an, LH6ko ikasleei beste hitzaldi bat emango zaie lasterketaren inguruko xehetasunak emanez eta Diego Garcia nor zen azalduz.
Halaber, argazki erakusketak egingo dira, eta amaiera emateko, martxoaren 25ean bazkaria egingo dute 25 urte hauetan lagundu duten guztiekin eta parte hartu nahi dutenekin. Bazkarirako Azkoitiko Plaza Berri Sporten eman daiteke izena.
Xehetasunak
Aurten ere, proba zuzenean emango da; corriendovoy-k hasiera eta iritsiera grabatuko ditu. Halaber, autobusak jarriko dira Donostiatik, Bilbotik eta Gasteiztik.
Lasterketa laburra 16:15ean hasiko da eta maratoi erdia, 16:30ean.
Izen-emateei dagokienez, martxoaren 22an itxiko dira, aurretik 1.000 partaidetara iritsi ezean. Izena Plaza Berri Sport saltokian eman daiteke.