Muruetako (Bizkaia) Motxoren idiek 53 plaza egin zituzten astelehen gauez. Ez zen emoziorik falta izan pilotalekuan, aurrez plazaratu zen idi pareak, Orioko Olidenen idiek, 52 plaza egin baitzituzten. Azken eguna izanik, jende asko bertaratu zen idi demak bertatik-bertara jarraitzeko.
Hiru egunetan hamabi idi pare lehiatu dira Gurean. Larunbat gauean lau idi pare izan ziren, eta bertan sailkapen nagusian laugarren postuan amaitu duen Gernikako Arane Jatetxeko idiek egin zituzten plaza gehien, 49 zehazki.
Larunbatean bi saio izan ziren. Arratsaldean, Azkoitiko Isidro Erretegiko idiek 38 plaza egin zituzten, eta gaueko saioan Zallako Zornotza anaienek 50 plaza egin zituzten. Plaza horiei esker, hirugarren postuan amaitu zuten bizkaitarrek dema.