Azkoitia-Azpeitia Maratoi Erdiaren antolatzaileek lasterketa datorren urteko apirilaren 1ean izango dela jakinarazi zuten. Handik gutxira, ordea, Donostiako Maratoi Erdia apirilaren 2an, hurrengo egunean, jokatuko zutela erabaki zuten donostiarrek. Normalean, maiatzaren erdi aldean izaten da Donostiakoa, baina aurten aldatzea erabaki dute. Hori dela eta, haserre daude Azkoitia-Azpeitia lasterketaren antolatzaileak: "Fede txarrez hartutako erabakia da; ez du zentzurik bi lasterketak asteburu berean antolatzeak", azaldu du Agustin Jimenez Azkoitia-Azpeitia lasterketako antolatzaileak.
Gainera, Donostiko lasterketaren data jakin zutenean, Donostiako Mugikortasun Sailera jo zuten antolatzaileek. Martin Ibabe zinegotziarekin hitz egin zuten, baina hark ezin zutela "ezer egin" esan zioten.
Ondorioz, Azkoitia-Azpeitia lasterketaren antolatzaileek erabaki dute publiko egitea euren desadostasuna, eta azaldu dute horrelako erabakiek "atletismoari kalte" egiten diotela.