Azkoitiko Udalak parte-hartze plan bat jarriko du martxan hilabete honetan merkatari eta ostalariei eskaintzen dizkien zerbitzuak eta diru-laguntzak baloratzeko eta hobetzeko. Atzo eguardian egin zuten horren aurkezpena Intsausti Jauregian, Udaleko hainbat teknikarik.
Miguel Angel Bastida zinegotziak adierazi zuen zerbitzu publikoak herritarrei "gerturatzea" eta haiei "erraztasunak ematea" dela euren asmoa.
Azkoitiko Udaleko hainbat departamentuk (Merkataritza Saila, Euskarako Zerbitzua, Hirigintza Saila...) eta zenbait entitatek (Azkoitia Lantzen, Iraurgi Berritzen, Herrixen merkataritza elkarteak...) zerbitzu eta diru-laguntzak eskaintzen dizkiete merkatariei eta ostalariei. Orain Udalak jakin nahi du ea gustora dauden eskaintzen zaien horrekin, eta aurrera begira zer hobetu nahiko luketen.
Udalak eta eragindako gainontzeko erakunde publikoek proposamen horien bideragarritasun teknikoa eta ekonomikoa aztertuko dute eta dagozkion egokitzapenak egingo dituzte 2016tik aurrera emango diren zerbitzu eta diru-laguntza publikoetan.
