Frantziatik, AEBetatik, Brasildik eta Filipinetatik etorri dira kazetariak, RCF, Travel Weekly, Folha de São Paulo edota Philippine Star izen handiko komunikabideentzat lan egiten dutenak, alegia.
Bisitan Juan Bautista Mendizabalek gisa honetako bitxikeriak kontatu zizkien: "Ohiturei eutsiz, lehen emakumeak amaren etxera bueltatu ohi ziren erditzera. Horregatik uste dugu San Ignazio Loiolakoa etxe honetan, Balda Etxean, jaioa izan zitekeela, –bertan bizi izan zen bere ama Marina de Lincona- eta ziurrenik jaio eta hurrengo egunean eramango zutela Loiolara".
Bisita amaitzeko musika izan zen protagonista. Organo Erromantikoaren Nazioarteko Zikloa tarteko, Parrokian egin zuten azken geldialdia eta Alize Mendizabal organistak eta Arimaz eta Errenteria Musikal ganbera orkestrek erruz gozarazi zieten. Eguzkia ezkutatuta ordurako, txotxa zain zuten. Kazetaritza erromesaldiari Manresan jarriko diote amaiera aste honen amaieran.
