Joseba Agirre Orbegozo azkoitiarrak Gipuzkoako Bertsolari Txapelketako sailkapen fasean hartuko du parte, Gipuzkoa Bertsotan izeneko lehian.
2011n ere hartu zuen parte, eta gustura geratu zen egindako lanarekin. Oraingoan ere, “helburu bakarra bertsotan gozatzea eta isilik ez geratzea" dela esan digu.
Hernanin bizi da azken urteotan Agirre, eta hango bertso-lagunekin entrenatzen duela esan digu, "nahi baino gutxiago", lan kontuak direla eta.
Egunotan Errumanian dabil lanean, eta "iganderako itzultzeko arazoak" izango dituela ere jakinarazi digu, azken orduko lan batzuk direla eta.
Larunbatean Astigarragako Kultur Etxean jokatuko diren bi saioek emango diote hasiera Gipuzkoako Bertsolari Txapelketarako sailkapen faseari. 74 bertsolarik hartuko dute parte Gipuzkoa Bertsotan saio sortan, horietako bi azkoitiarrak: Joseba Agirre eta Eneritz Artetxe.