Paneletan Juan Bautista Mendizabalen testuak daude idatzita, hiru hizkuntzatan: euskaraz, gazteleraz eta ingelesez. Istorioa herriko pertsona ospetsuen bitartez kontatzen da (Jorge Oteiza, Peña Floridako Kondea, Atano III.a, besteak beste), haien arteko elkarrizketa, eztabaida eta kontaeretan oinarrituta.
Arduradunen iritziz, herritarrentzat nahiz kanpotik etortzen direnentzat “panelak oso baliagarriak izango dira, herria beste modura batean ezagutzeko eta, gainera, Azkoitia bisitatzeko ibilbidea zehazten lagunduko dute”. Panelez gain, esku orri gidak ere eskuragarri egongo dira udaletxean nahiz turismo bulegoan.
Bestalde, urdin koloreko 24 plaka jarriko dituzte herriko eraikin esanguratsuenetan. Plakek eraikin bakoitzaren informazioa jaso dute, eta modu horretan, Azkoitiko historiaren pasarteak jasoko dituzte. Eraikin edo pertsonaien istorio eta nondik norakoak kontatzeko hiru balore hartu dira kontuan: nortasuna, lehiakortasuna eta ekintzailetasuna.
Zarauzko Arazi zerbitzu-enpresak eta Azkoitiko Udalak elkarlanean egindako proiektua da, eta enpresako zuzendari Juanjo Aranburuk azaldu duenez, nahi duenak sakelako telefonotik ere informazioa deskargatzeko aukera izango du QR kodearen bitartez. Proiektuak, guztira, 8.000 euroko kostua du.