KOADERNO BERDEKO POSTALAK-42
Dagoeneko badira hamar urte
elkarrekin bizitzen jarri ginela.
Umetan ezagutu zintudan
zure hizkera alai eta jostalariarekin.
Ikasgelan ere elkarrekin egokitu ginen
zure inguruko jende asko ezagutu nuen.
Gero eta gusturago sentitzen nintzen zurekin
halaxe esan nizun behin baino gehiagotan.
Ostiral gauetan zinera joaten hasi ginenean
zure baitakoak hobeto ezagutzen hasi nintzen
zaletasunak desioak pasioak
bizitza bera orobat.
Ostirala asteburu osora luzatu zen
eta amets egiten hasi ginen elkarri begira.
Jakinmina irrika bihurtu zitzaigun
irrika gozamen, gozamena etorkizun
eta etorkizuna maitasunaren hazkurri.
Eta elkarrekin bizitzea erabaki genuen.
Hamar urte joan dira harrez geroztik
eta orduan baino gehiago
maite zaitut, Azkoitti.
Aitor Arruti Rezabal