Dagoeneko zaharkituta geratu da Udalak 2000. urtean Tokiko Agenda 21 egitarauarekin bat egin ondoren 2002.ean egindako Ingurumenaren 1. Ekintza-plana. Udalari egokiagoa iruditu zaio orain planaren izaera moldatu eta ingurumen arlora bideratzea, eta egungo ingurumen-errealitateari erantzuteko plana osatzeko lanei ekin die.
Horretarako, Elkarrekin 21 izeneko lantaldea lanean aritu da urte osoan zehar. Lehen urrats gisa, herriko Ingurumen-diagnosia osatu zuen. Egungo Azkoitiko ingurumenari loturiko esparruen inguruko informazioa biltzen duen txostena da, parte-hartze prozesu baten bitartez osatu eta adostu ahal izan dena: batetik, Elkarrekin 21eko teknikariak herriko zenbait eragilerekin (jubilatu-elkartea, tabernariak, merkatariak, ikastetxeetako eragileak, etab.) elkartu ziren; bestetik, urrian egindako Herri-batzar ireki batean jaso zituzten ekarpenekin adostu ahal izan zen Azkoitiko errealitate berriaren argazkia.
Diagnostiko eskuetan izanik, Ingurumeneko Ekintza-plan berria diseinatzeari ekin diote. Elkarrekin 21 taldeak diseinatu duen Ekintza-plan horren lehen zirriborroa Udalarekin adostua izan da. Bertan jasotzen diren Azkoitiko etorkizunerako helburu eta ekintzak nagusiak herritarrekin partekatu nahi dituzte. Izan ere, dokumentua Azkoitiko Ingurumeneko Ekintza-plan berria osatzeko oinarrizko dokumentua izango denez, herriko entitateekin, elkarteekin, erakundeekin, zein herriko eragile sozial eta ekonomikoekin diseinatzeko asmoa dute.
Horregatik guztiarengatik, gaur, abenduak 10, Azkoitiko Elkarguneko areto nagusian 18:30ean egingo den bilerara gonbidatzen dituzte herritarrak. Bilerarako Ekintza-planaren zirriborroa begiratzea ezinbestekoa izango da bertan ekarpenak modu eraginkorrean egin ahal izateko.
Hona hemen bilerako gai-zerrenda:
- Ingurumeneko Ekintza-planaren helburu eta programa nagusien aurkezpena.
- Helburu bakoitzaren taldekako lana: proposatzen diren ekintzak berrikustea (ekarpenak jasotzea).
- Ekarpenak bateratzea eta Ekintza-plana adostea.