Etxerik gabe geratzeko arriskuan dauden herritarrei prozesu aurretiko laguntza juridikoa doan eskainiko die Udalak.
Gipuzkoako Aldundiak eta abokatuen elkargoak zerbitzu hori bermatzea hitzartu dute, eta akordioarekin bat egin du Azkoitiko Udalak ere.
Etxebizitzaren hipoteka ordaindu ezinik, etxea galtzeko arriskuan dauden herritarrei epaiketa judiziala hasi baino lehen, finantza erakundeekin adostera iristeko beharrezko laguntza juridikoa eskaintzea da helburu nagusia.
Zerbitzua behar duten herritarrek Udaleko gizarte zerbitzuetan eskatu beharko dute, eta handik bideratuko diote hitzordua abokatu batekin.
Udalaren osoko bilkuran onartu zen zerbitzu hori eskaintzea, eta, beharrezko izapideak eginda, zerbitzua aste gutxi barru jarriko da abian.