Argazkilaritza estenopeikoak gaur egungo argazkilaritzaren jatorria dakarkigu gogora. Lehenaldira begirada bat da, nostalgikoa sentimenduan, didaktikoa motibazioan, artistikoa proposamenean.
Argazkilari handiek egin izan dute, eta egiten dute oraindik, beraien buruari jarritako desafio bezala, ia teknologia guztia bazter utzita, gure baitan daukagun argazkilaria bila eta gogoetan ariko balira bezala.
Denboraren joanean, kamera iluna bilakatu egin da, baina aldi berean oraingo kamera digital bakoitzaren barruan dago, hamaika torloju ttiki, lente, diafragma eta obturatzaileren artean.
Seguraski, kamera estenopeikoa da argazki kamera bat irudikatzeko eta argazkiak ateratzeko modurik xumeena. Kamera bat egitea oso erraza da, eta, erabat eskuz egiten denez, badira kamera horiekin erabat hobetzeari eta esperimentatzeari ekin dioten izen handiko argazkilariak, benetan irudi apartak eskuratuz, haien bitartez bakarrik lor daitekeen estilo bakana ere sortuz.
