Euskara ikasi eta hobetzeko ikastaroetarako izena emateko epean gaude. Hori dela eta, Azkoitiko AEK-koen berri jakin nahi izan dugu, eta Izarok argitu dizkigu gure zalantzak:
Zer ikastaro eskaintzen dituzue?
Eskaintza zabala dugu: Euskalduntze maila guztiak eskaintzen ditugu; sarbide ikastaroak, behe maila, tarteko maila eta goi maila. Egiaztagiriak lortzeko ikastaroak ere bai; B1 (1.maila), B2 (2.maila), C1 (3.maila edo EGA) eta C2 online (4.maila). Alfabetatze ikastaroak, gurasoentzako ikastaroak eta Mintzalagun taldeak ere baditugu.
Noiz eman daiteke izena? Zein da matrikulatzeko epea?
13-14 ikasturteko matrikulazio epea irekita dago irailaren 25a arte.
Taldeak osatzerakoan, ba al da gutxieneko kopururik?
Taldeak gutxienez 8 lagunekoak izaten dira.
Zenbat kostatzen da izena ematea?
Matrikularen prezioa ikastaroaren iraupenaren araberakoa izaten da. Normalean astean 8 orduko ikastaroak eskaintzen ditugu, irailaren 30ean hasi eta ekainaren 19ra arte.
Ikastaro horien prezioa 435,6 €-koa da. Hala ere, aipatu behar da Azkoitiko Udalak euskara ikasteagatik diru-laguntzak eskaintzen dituela, eta aurten beka-sistema horrek berrikuntza
bat izango duela. Matrikularen %75a itzuliko dio Udalak asistentzia onarekin ikastaroa gainditzen duen ikasle orori. Gainera, ordainketa ikasturtea amaitu ondoren egin ordez,
Gabon aurretik bekaren %40a eskuratu ahal izango du euskara ikasleak.